Bakit Peligroso ang mga Subduction Zones?

Tulad ng mga nabanggit sa mga nakaraang isinulat na blog, ang Pilipinas ay napapaligiran ng mga “lubugan” o “Subduction Zones”. Ang nasa silangan ay ang Philippine Trench at East Luzon Trough, at ang nasa kanluran ay ang Manila Trench, Negros Trench, at Cotabato Trench. Ang mga ito ay lugar o parte ng “crust” o balat ng mundo na kung saan ang isang mas mabigat na balat ay lumulubog sa ilalim ng isa pa. Ang resulta: malalalim na hukay na hugis pahaba at pakurba na umaabot sa ilang kilometro ang lalim, sa karagatan. Bakit mahalaga na malaman natin ang mga bagay patungkol sa mga ito? Sapagkat ang pinakakamalakas na mga lindol ay nagmumula sa mga lugar na ito, halimbawa na nga ay ang pinakamalakas na lindol na nakatala ---ang Magnitude (Mw) 9.5 na lindol sa Valdivia, Chile noong 1960, ganun na rin ang mga mapinsalang lindol na nagbunga ng tsunami sa Sumatra noong 2004 at ang tsunami sa bansang Hapon nito lamang 2011.

Ngunit papaano sa mga ito nagmumula ang mga lindol? Ang tinatawag ay ang paraan ng “elastic rebound” o pag-igkas sa mga bato ng naipon na lakas na matagal nang nakabinbin: Ang naipon na lakas dahil sa pagbatak ay lumampas na sa tibay ng mga batuhan o kaya'y lumampas na sa “friction” na gawa ng pagsayad ng isang balat o “plato de tektoniko” laban sa isa pa. Ang resulta ay ang pag-igkas ng mga bato ng mga platong tektoniko na ito, at nagpapadala ng lakas sismiko o lindol, at mga iba pang nakapipinsalang pangyayari tulad ng pagkakaroon ng tsunami (lakas sismiko na napunta sa tubigan). Ang proseso ng elastic rebound ay natutulad din sa pagbatak ng goma: dumarating ang panahon na ang goma ay hindi na makakayanan ang pagbatak, at ito'y napuputol at umiigkas. Ganun na rin ang isang lapis kapag sinubukan na baliin ng mga kamay: ang pagkabiyak nito ay tinatawag na “rupture stage” at kapag ito'y nangyari, ang pag-igkas ng mga “shock waves” ay nalilipat sa mga parte ng lapis at ganun na rin sa mga kamay.

Ang Timog Amerika ay may napakahabang lubugan o subduction zone (Nazca Trench). Umaabot sa anim hanggang anim na libong milya ang haba nito; Ganun na rin ang bansang Hapon na mayroong Japan Trench, Ryuku Trench at Nankai Trench. Ang Pilipinas ay mayroong napakahabang Manila Trench na umaabot mula Mindoro hanggang Taiwan. Ganun na rin ang Philippine Trench na umaabot mula Catanduanes hanggang malapit sa Indonesia.

Ang isa sa pinakamahalagang katanungan ay magdudulot ba ang mga ito ng malalakas na lindol na umaabot sa sa Magnitude 9.0??? Atin po itong tatalakayin sa mga susunod na blog. Kaya't subaybayan po nila!!!